處女黨的另一半香香君馨老公做「跟得先生」

【蘋果日報】大台話晒都仲係香港最大嘅電視台，內部梗係有唔少黨派團體，不過講緊嘅唔係派系鬥爭，而係大台藝員們三五知己搞嘅兄弟團、姊妹團，當中最出名之一嘅就係有「處女黨」之稱嘅「Amazing Esther」，而佢哋大部份仲已經做晒人妻，而唯一未出嫁嘅苟芸慧同男友陸漢洋亦都打得火熱，相信距離成為人妻不遠。
不過佢哋嘅男伴條件又係點呢？
李亞男
處女黨入面最早做人妻嘅就係32歲嘅李亞男，佢同老公王祖藍喺2015年結婚。呢段「長短腳」之戀，老公王祖藍身高比老婆矮，不過事業上王祖藍近年北上發展，收入十級跳，仲開公司做經理人，早年仲以逾1億1千萬，買豪宅送畀老婆李亞男，連埋其他物業，估計祖藍身家超過2億。
鍾嘉欣
33歲嘅鍾嘉欣喺前年喺加年大同脊醫男友Jeremy Leung結婚，而呢位Jeremy係大台高層梁乃鵬嘅姪仔，至於Jeremy身家，有指其位於溫哥華豪宅區嘅寓所市值過千萬港幣，而Jeremy年薪近600萬港元。
岑麗香
多年嚟32歲嘅岑麗香少有緋聞，不過喺前年被爆同6呎高大健碩男「強強」拍拖，當時有指呢位「強強」係金融才俊，佢哋仲喺去年結婚，而婚後「強強」做埋跟得老公，一齊返香港定居。
王君馨
31歲嘅王君馨去年底同圈外拍拖11年嘅初戀男友Daniel入紙註冊結婚，同Daniel多年嘅異地戀開花結果，同香香老公一樣Daniel婚後亦同樣選擇返香港定居。
苟芸慧
苟姑娘現年34歲，雖然係「處女黨」唯一未嫁嘅成員，不過男友陸漢洋已經向苟姑娘求婚。而陸漢洋身家一啲都唔輸蝕，除咗係知名賽車手之外，仲係錫礦大王陸佑後人，父親係公和建築創辦人陸孝佩、媽媽係聖安娜餅店創辦人。