徐子珊食童子尿醃蛋張鈞甯飲尿吞蚯蚓被讚女漢子

【蘋果日報】陳啟泰就以飲尿來養生，其實坊間都有好多唔同嘅天然養生方法，近年就有好多藝人食蟲、飲尿，但佢哋並唔係為咗養生、健康，而係為咗拍好個節目。
徐子珊
離開大台後嘅子珊，專注設計自家珠寶品牌，之後就改簽王祖藍嘅經理人公司，正式北上發展，祖藍為咗幫子珊喺內地增加知名度，除咗安排佢喺自己啲演唱會做嘉賓外，之前仲幫佢接綜藝節目，好以之前就接咗真人騷《吃光全宇宙》，節目入面子珊仲藝高人膽大咁食咗一隻童子尿醃製而成嘅「醃蛋」，見佢仲食得津津有味㖭！
張鈞甯
15年內地綜藝節目《跟著貝爾去冒險》請到知名主持人、生存專家貝爾做主持，張鈞甯就係其中一個參加者，而佢係節目入面除咗要上山下海外，仲要挑戰飲自己嘅尿同生吞蚯蚓，好多網民都大讚佢係真女漢子。
馬德鐘
除咗張鈞甯，馬德鐘都喺15年參加內地真人騷節目《今天吃什麼》入面，即場捉竹蟲兼生吞，嚇得同場嘅台灣藝人陳建州呆咗，而馬神亦即時餵黑人食竹蟲㖭！
周雅霏
旅遊達人周雅霏(Faye)之前就幫ViuTV拍攝旅遊節目《阿美利堅有外星人》時，節目入面佢駕車去新墨西哥州城巿阿布奎基時，佢就發現到另類零食煙肉芝士味嘅蟋蟀乾同辣味蟲乾，咁佢就買嚟試下，食咗十分鐘後，唔知係咪熱氣得滯，佢竟然流鼻血，要停機休息。