李潤庭同小三「未分手」即被炒周志文衰花心

【蘋果日報】大台話晒都仲係全香港最大嘅電視台，好多藝員就算約滿都會同大台好嚟好去，話晒點都多過曝光平台吖嘛！不過當中都有唔少藝員都有被「豉椒炒魷」，無他嘅形象唔好吖嘛！
吳岱融
58歲嘅吳岱融87年嚟香港發展，簽約大台後仲極速成為當家小生之一，又拍過唔少代表作，不過喺93年因為私自去亞視宣傳個人唱片而被大台雪藏，最後仲畀大台解約。
李潤庭
講到近年被大台炒嘅俵俵者非李潤庭莫屬，去年底李潤庭被爆背妻偷食，事後公開道歉不過仍被大台雪藏，至今年中慢慢解凍復出，不過冇耐再被爆同小三「未分手」，隨即被大台解約。
周志文
參加《超級巨星》入行嘅周志文加入大台主要飾演配角，不過佢嘅緋聞就非常多，先後同馬賽、蔡思貝、吳若希、陳瀅、劉佩玥、何雁詩傳緋聞，花心形象仲搞到大台同佢解約。
羅鈞滿
曾經同大台女主播張文采拍拖嘅羅鈞滿，被爆偷嗒長髮空姐而被狠飛，加上屢次醉駕而形象插水，喺去年台慶日宣佈提前解約，不過有指其實係畀大台炒魷。