【馮仁昭四圍超】樂瞳愛漁村風

【蘋果日報】中秋節好多人都會送月餅，不過除咗月餅，DIY中秋應節賀禮送畀親朋戚友表心意，都係唔錯嘅選擇。今日中秋節，自細喺大澳漁村長大嘅樂瞳話：「其實漁村長大嘅小朋友，中秋節冇乜特別嘢玩，更加唔會玩電子燈籠，而係會買大堆蠟燭玩煲蠟，嗰時執法唔算嚴，大人又會喺空曠地方放煙花，每家每戶掛住五顏六色嘅紙燈籠，好有節日氣氛。」
點蠟燭加分
樂瞳今次特別請嚟蠟燭造型師，教佢製作兔仔、月亮，同埋月餅造型嘅蠟燭應吓節。樂瞳話：「就算喺屋企食一餐普通晚飯，我都鍾意點個有香味嘅蠟燭座，情調氣氛都會唔同啲，所以我推介如果男仔同女仔食飯，記得要點蠟燭，女仔即刻對你印象加分。」