鄒兆龍晒家庭照洗底小三狙擊：穿戴我買的東西辱你老婆

【蘋果日報】喺電影《九品芝麻官》飾演「常威」而深入民心嘅鄒兆龍，雖然佢同89年港姐太太翁為德結婚18年，生咗一對孖仔同一個女，本來大家都認定佢係好好先生，點知喺8月底俾一名大陸女子喺微博開post爆料，公開同鄒兆龍嘅甜蜜微信語音互動、一系列摸腿照，甚至話鄒兆龍喺交往期間曾幫佢洗內褲，除咗佢之外，鄒兆龍仲一腳踏幾條船，仲話佢係個無情無義嘅賤男！
點知成件事隔咗一個禮拜左右，佢老婆翁為德喺鄒兆龍大陸經理人嘅微博現身，見佢手持一份聲明，表明會撐老公到底。有網民對佢寄語無限同情，甚至有人話老公去玩，做老婆嘅都要撐到底！為咗洗脫賤男嘅形象，鄒兆龍先後喺微博貼用對腳高舉囡囡嘅相，而囡囡亦拗晒腰擺pose，日前又貼陪一對孖仔打GOLF嘅相，佢話：「等退休後最想做的事情就是.....跟著你們兄弟倆世界各地去比賽！」不過佢嘅微博自此之後就唔畀人留言。
前日鄒兆龍又出招，今次佢POST咗一家五嘅食飯相兼留言話：「I am very fortunate, because I have them.」但係呢張相似乎觸動咗小三嘅神經，搞到佢又開post喪插鄒兆龍，佢話：「穿著我買的內褲，頭上戴著我買的頭巾，穿戴我買的東西辱你老婆呢？」
鄒兆龍又有乜嘢對策？咪唔俾人留言囉！