索主播陳嘉倩Last Day喇甜笑告別新聞台

【蘋果日報】喺2014年由nowTV過檔無綫，被網民激讚係無綫最索主播嘅「嘉倩BB」陳嘉倩，日前向《蘋果》承認已經向無綫請辭，而且仲會去浸大讀傳理學文學碩士，做一個全職學生增值一吓自己。其後嘉倩BB亦喺fB留言：「一路走來，有遇上過不同挑戰、迷惑、感動。間中有迷失，但好人好事實在太多。感恩，您們一直都在。」
原來前晚係嘉倩BB嘅last day，佢如常喺晚上9點半報天氣報告，喺節目尾聲佢笑得好甜咁對住鏡頭講：「祝大家每一日都有好天氣，好心情，多謝一直以嚟嘅支持，拜拜。」跟住佢嘅好拍檔張文采亦都喺微博貼一張同嘉倩BB嘅晒腿相，佢仲話：「再見嘉倩bb!#無人同我食茄通落勁多辣椒油##各位早晨早晨呀嘉倩！」
查實除咗張文采之外，唔少網民都有cap圖留言話唔捨得，有啲話唔知仲有機會喺其他台見到嘉倩BB，又或者唔知讀完書之後又會唔會回歸，不過正如嘉倩BB接受訪問嗰陣講過：「我諗呢個世界冇咩冇可能，睇吓之後有咩機會啦，我都open嘅，如果有合適MC job都唔抗拒。」