稱愛烹飪　入獄後「想做廚房」

【蘋果日報】法庭目前正審理包括戴耀廷在內9名參與佔領行動人士案件，戴預計最快會明年1月被判入獄，近年他已就入獄作最壞心理準備，包括可能失去教職，甚至要賣樓應付生活，形容面對一個用恐嚇方式統治的政權時，最重要不被對方嚇倒，「點可以唔俾佢嚇倒？就係你要去調整心態，咁樣佢就嚇你唔到」。


「希望可以幫朱牧打甩」

戴耀廷稱早前上庭時，在犯人欄與已入獄的社民連黃浩銘共處，與對方輕鬆討論過自己日後坐監，最想做哪些工作崗位，「我想做廚房，因為我幾鍾意煮嘢食，或者將來整番個教授廚房」。


戴又與同為教師的陳健民討論過，認為坐監除身體需重新適應外，心理問題應不大，更笑說：「尤其鍾意開做學術研究嘅人呢，冇乜太大壓力，因為我哋係咪都咁宅，成日都係匿喺自己間房，呢度（大學辦公室）其實可以話係一個監獄嚟㗎！」

然而戴和陳健民最擔心是另一戰友、今年已73歲的朱耀明牧師，他坦言「我哋好希望朱牧可以唔使坐監」，指從控方證據中，看不到朱牧曾做過煽惑他人的事，過去朱亦不多在台上發言，「我哋希望可以幫朱牧打甩，否則亦希望可以判緩刑，主要因為佢嘅身體問題，加上佢過去對社會服務貢獻真係好大」。


對於何君堯連串針對自己的行動，戴認為從建制派在何「甩轆」後劃清界線反應，反映今次或是建制派或北京「其中一條線嘅行動」，認為何此舉只為搶奪建制派內話語權，「其實佢（何君堯）搵我嚟上位嘅箒，不過好可惜，佢自己拗柴，唔止上唔到位，依家仲要自己承受一啲問題」。


■記者林俊謙