方力申行暖男路線

【蘋果日報】方力申與蘇麗珊早前為葉念琛新戲《愛情奴隸獸》宣傳，小方飾演高海寧的奴隸獸，他說：「我要喺銅鑼灣跪喺佢面前被佢摑，都係快閃拍，因為都有啲尷尬。現實中我梗係唔係奴隸獸啦，但我好明白嗰啲做奴隸嘅男仔，對佢哋嚟講係愛嘅表現，佢哋甘願俾女仔食住。」問到他曾否被女友食住？小方即說：「我冇，Stephy（前女友鄧麗欣）唔係啲咁嘅人，我係行暖男路線㗎。」


蘇麗珊聞言即指小方好細心：「佢成日撩我講嘢，佢其實個個都撩，男女都撩。」小方即自豪表示看過蘇麗珊男友的照片，又大讚對方。至於蘇麗珊可有問小方交換女仔相？小方即搶答：「我咁有經驗，點會咁易交換相呀？」蘇麗珊亦笑謂：「佢好官腔㗎。」


採訪：盧妹

攝影：陳慧安