財女手筆：油股起錨　中海油財息兼收

【蘋果日報】近兩日大市氣氛急轉直下，今年幾個熱炒板塊包括內房、汽車同手機設備股都急挫，跌幅動輒以一成起標，波幅誇過股仔同衍生工具。喺大市氣氛轉差之下，偏偏今年以來大幅跑輸大市既石油股卻起錨。
本欄於今年7月中8.7元時推介中海油（883），預期佢必然追落後跑贏大市，兩個月下來，油股食住油價見底呢個利好因素，外加中期業績省鏡，股息率高，係入市財息兼收之選。到噚日，中海油以最高位大陽燭收市，見9.9元，累計升幅達14%，同期國指升幅只有2%。
再重溫一次，中海油2017年半年虧轉盈。最重要嘅桶油主要成本降到31.74美元一桶，以現時國際油價喺升至接近60美元一桶，中海油基本上下半年會勁賺。中海油價值重估已經開始。再加上中期息派20港仙，比上年同期大升67%，如果嚟緊全年業績維持派23港仙，保守估計現價息率達仍有接近4厘，咁嘅背景之下，中海油繼續為進可攻退可守嘅上上之選，坐定定，財息兼收。
Melody