【馮仁昭四圍超】亞姐姊妹當面爆料羅霖緊張「好事近」　

【蘋果日報】與羅霖同屆嘅91年亞姐第五名王瑋，將於11月7日喺旺角麥花臣舉行「王瑋Grace等愛的女人見證音樂會」，噚日王瑋喺尖沙嘴宣傳時率先一展歌喉，一班老友羅霖、楊玉梅、張家瑩、程瑤、魏秋樺同張煒等都有出席力撐。
羅霖話會全力支持好姊妹，雖然唔會上台唱歌，但會呼籲人買飛。王瑋就話：「三年幾前回流香港，重踏舞台實現兒時夢想，知道唔係乜大明星做騷，但覺得用心實現最重要，實現夢想並唔係一個人力量。」
羅霖又叫王瑋搵番個男朋友，但王瑋講笑話：「我囝囝咪我男朋友囉，佢係我最大動力。」羅霖仲反俾王瑋爆佢好事近，羅霖即刻好緊張話：「我未未未，唔好爆我啲嘢住，講你先。」
張煒考慮備案
另外，張瑛個仔張煒早前俾人盜用相片向女性騙財，佢話：「以我所知係一個社交網詐騙集團，專向台灣寂寞婦女埋手，曾經有粉絲被騙80萬新台幣（約21萬港元），我叫對方過嚟香港報警，但對方屬於政治家庭，唔方便將事件張揚，我都冇辦法。」張煒仲話最近有人冒佢身份向女性借錢，佢會考慮備案。
撰文：馮仁昭