灑直播室即炒無綫前主播余浩宗：呢個回憶都幾開心

【蘋果日報】去年10月本身已經向大台辭職嘅余浩宗(Cyrus)，離職前就去咗泰國充電，返工前就去恤個靚髮，點知就出事喇！最後搞到Cyrus好唔開心，喺直播新聞到時眼紅紅，最後淚灑直播室，之後仲被炒魷。當時有Cyrus嘅朋友向《蘋果》爆料：「佢啱啱去咗泰國玩，一返工就俾花哥(新聞部總監袁志偉)照肺，問佢點解剪咗髮，話佢髮型唔好睇，叫佢要做通宵更，做到離職嗰日，佢好唔開心！」其後Cyrus接受《蘋果》訪問時，直認唔會再喺幕前出現，但之後又收到大台人事部通知，話唔炒佢，但就叫佢唔使返工、有需要先搵佢，話佢嘅last day就同佢辭職日期一樣。被炒固然唔開心，但Cyrus話最唔開心嘅係冇機會同觀眾講再見。
點都好，件事都已成過去，離開主播行列一年嘅Cyrus，講到將來可會再考慮重操故業？佢話將來嘅事真係冇人會知，但現時家好享受自己嘅工作，又自爆原來讀完書後，曾經喺TVB返過三個月做免費工，又喺獵頭公司做過。Cyrus話「記得嗰時我係由周嘉儀訓練，主要都係因為我有好多懶音，唔知點解嗰時好多字都講唔到，最後做咗3個月我就離開咗，去咗一間獵頭公司度做。」
回憶當年喺獵頭公司返工，Cyrus話一日真係見好多唔同嘅人，而且大部嘅人都比佢年紀大，因為身份關係，都要盡量扮到自己好成熟，佢話「呢個回憶都幾開心，同埋見到好多唔同嘅人，自己都會學到嘢！」