《蘭花刼》十年後翻生《天與地》等咗兩年先播

【蘋果日報】大台嘅作風有時真係估佢唔到，連11年前拍落嘅綜藝節目都可以搵番出嚟播，「懷舊經典」呢條水真係長做長有。
當然啦，正面睇就叫懷舊，調轉睇其實曾經放過入倉底鋪塵，好似早幾個月，大台就拎咗一套06年拍完嘅《蘭花刼》嚟攝咗9點半黃金檔期。宣傳時話會高清修復，點知出到嚟就俾人笑最清係啲字幕……。
系列作都有機會擺入倉，《巾幗梟雄》頭兩輯分別喺09同10年播出，第三輯原先係13年就拍完，當年嘅節目巡禮都見過下影，但最終又係收番起，到上年底先拎出嚟播。
「This city is dying」，呢個對白，出自大台神劇《天與地》，故事由一次人食人事件發展，講人性講道德，話題終於唔係爭產、老公老婆出軌咁老套。不過都係呢個原因，《天與地》曾經雪咗兩年先有得見街。
至於喺倉入排緊隊嘅集，就有陳慧珊、黃智賢嘅《波士早晨》，拍完兩年都未有得出街。排到隊嘅都可能俾人打尖，好似黃智雯同陳智燊嘅《三個女人一個「因」》，原本5月尾播，但《蘭花刼》、《賭城群英會》、《同盟》係咁打尖，或者都要入番倉再排過隊。