伍詠薇為偷食老公執手尾李心潔原諒彭順誕孖仔

【蘋果日報】朱慧敏因彭懷安（Eddie）偷食，令到二人婚事告吹，但日前就有《蘋果》讀者影到佢哋一齊坐廉航去日本旅行，大玩地下情。其實好多愛情都係經得起考驗，過往亦有好多女藝人，都會原諒曾背叛佢哋嘅另一半，好多仲結婚有埋下一代，開開心心咁生活落去。


去年6月伍詠薇老公練海棠，就被周刊影到同一名34D長髮女於車廂密會兩個鐘，事後伍姑娘現身錄影節目時公開代夫道歉，又放聲氣話老公「玩完要老婆執手尾」。事後伍姑娘照舊同老公去旅行，仲喺微博晒水着照，證明心情未受影響。


2014年，彭順與O靚模李悦彤被影到兩人肆無忌憚當眾拖手、啜嘴、搣胸、搭膊、攬腰，之後直落返將軍澳愛巢，彭順之後即飛去大馬搵老婆箍煲，最後心潔都原諒咗老公，去年更為彭順誕下一對孖仔。