中環在線：美國縮表　點解唔見陳德霖？

【蘋果日報】次次美國聯儲局有乜大動作，朝早肯定有金管局總裁陳德霖（Norman）喺IFC二期地下見記者。聯儲局終於敲定十月縮表咁大件事，噚日就由署理總裁余偉文上陣，咁Norman去咗邊？原來係跟貿發局一齊去倫敦，出席「Think Asia Think Hong Kong」招商活動。
另一個財金大佬都罕有地冇露面，講緊嘅就係每逢星期四出Blog嘅金管局前總裁任志剛嘞，自從8月起，每個星期四佢都發文，不時點評財金政策，個個禮拜都搞到某啲人周身唔自在，點知噚日最需要佢Insight嘅時候，反而冇寫文，相信唔少人都幾失望。
至於重返校園嘅財經事務及庫務局前局長陳家強，大大方方喺facebook話，好高興見到聯儲局照原訂計劃縮表，開始貨幣政策正常化，最緊要就係趁美國總統特朗普未為聯儲局任命過程「添變數」之前進行咁話。無官一身輕之後，講嘢果然爽快。
李華華
LiWaWa@AppleDaily.com