斥李國章拒溝通釀混亂　惡果由學生承受《學苑》前副總編「港大人都欠咗Billy」

【蘋果日報】「對話！對話！」逾200名港大學生去年初圍堵校委會會議場外，要求校委會主席李國章及校長馬斐森回應改革校委會的訴求。《學苑》前副總編輯陳雅明當晚站在李國章、馬斐森及港大學生會前會長馮敬恩身旁。陳接受《蘋果》訪問時憶述，現場沒聽見馮向李國章大叫「唔好畀佢走」、「隊冧佢」，又指「我唔覺佢（李）有咁驚，佢當時表情係施施然」。陳認為當晚混亂源於校方拒絕與學生溝通，惡果卻由馮敬恩承受，直言「所有港大人都虧欠咗Billy（馮敬恩）」。
記者：葉偉東
副校風波觸發學生要求改革校委會，去年初更發動罷課，要求校方回應改革訴求不果；逾200名港大生於1月26日聚集校委會會議場地──沙宣道賽馬會跨學科研究大樓，封鎖停車場、正門出入口，要求校委交代。
《學苑》前副總編輯陳雅明是當晚抗爭者之一，「我記得當晚好黑、好凍，訊息好混亂……當時多數人喺停車場或（沙宣道）出面等緊，而我呢一邊（近正門位置）就係記者、學生休息嘅位，人唔多」；直至校委完成會議，李國章、馬斐森等人由正門步出，與陳迎頭碰上。他被夾在大批學生與李、馬之間。
陳雅明形容，李國章、馬斐森當時大模斯樣步出，「行咗差唔多十米，先有學生意識到佢哋出嚟，然後先圍住佢」。後來保安與學生推撞導致混亂，「主要衝突係因為保安推我哋，所以後面啲人先推上前，後尾越來越多人推，所以先製造咗啲混亂」，強調學生與李國章並無身體接觸，「我唔覺佢（李）有咁驚，佢當時表情係施施然」。
他曾以英語向馬斐森要求對話，換來校長一句「too dangerous（太危險）」，「唔算十分群情洶湧，亦都冇用任何肢體抗爭，推上前冇、掟嘢冇，屬於肢體動作都冇……（學生）都只係包圍，唔畀佢走出呢個範圍」。站在中間的李國章「向唔到前又走唔到」，當時罷課委員會成員梁麗幗要求李與學生對話，「李國章當時同馬斐森係應承咗，不過就話要畀佢哋返入去先，點知一返去，李國章就冇再出嚟」。
稱無聽到「隊冧佢」
事後李國章在庭上指控馮敬恩向他大叫「唔好畀佢走」、「隊冧佢」，陳雅明卻稱「完全冇聽到呢一句」，「都冇任何片證明有；佢（李）又不斷強調自己當晚好驚，俾暴民包圍，去說服社會其他人士『佢當時係受到學生嘅嚴重迫害』，去合理化自己唔同學生溝通嘅行為」。
馮敬恩如今罪成負上刑責，陳雅明認為「所有港大人都虧欠咗Billy（馮敬恩）」，「我始終覺得，所有港大人都要出嚟抗爭，但當時只係得幾百人……成個港大其實有成1.5萬人，如果當日係有過萬人參加，我相信情況會唔同」。他慨嘆馮敬恩只是爭取改革，「所有校委會人士係對佢唔公道、所有港大冇出嚟抗爭嘅人士都係對佢唔公道；當時我哋係爭取緊港大嘅自主，但大家冇出嚟，令佢成為第一個因為爭取院校自主而被判罪留案底嘅學生」。