【馮仁昭四圍超】黃智雯好事近杏兒爆姊妹出嫁

【蘋果日報】張智霖（Chilam）、胡杏兒、陳瀅同童愛玲等前晚喺尖沙嘴出席一手錶品牌25周年展覽開幕禮，預產期下月尾嘅杏兒以1.5吋高踭鞋亮相。杏兒話最貴嘅錶價錢唔過7位數，身邊嘅Chilam笑佢係小富婆，杏兒話：「買錶都係獎勵自己，今次同胡說八道會去拍節目好開心，特別係戴住姚子羚男友（鄭子邦）面具扮求婚，其實我都好替姊妹心急。」佢又大爆有胡說八道會姊妹即將出嫁，不過就唔肯講係邊一位。據知，好事近嘅姊妹就係黃智雯同珠寶集團高層男友詹文天。Chilam見到腹大便便嘅杏兒又話：「以前杏兒好有侵略性，依家變得溫柔有媽媽樣。」
陳瀅寄情工作
同場嘅陳瀅講到前度何猷亨有意追麥明詩時，佢祝前度好運：「唔會酸溜溜。」陳瀅力證好友劉佩玥仍然單身，冇聽過佢身邊有富商男友，自己則單身寄情工作。
另外，Chilam噚日喺尖沙嘴出席愛護動物協會活動，佢話屋企已經有兩隻狗，但都想養多啲動物。講到囝囝，Chilam話阿仔有幽默感，係屋企嘅潤滑劑。
撰文：馮仁昭