發哥愛去九龍城買餸土豪金栢芝街市買叉燒

【蘋果日報】賭王千金何超雲不時會到灣仔街市買餸，其實原來有唔少藝人都唔怕街市濕漉漉，好鍾意到街市買餸返屋企煮飯仔。
周潤發
相信好多人都知發哥係九龍城街市嘅常客，佢就曾經被傳媒影過佢同發媽去九龍城街市辦年貨之餘，亦試過同發嫂去街市買餸喇，絕對係一個好老公同乖乖仔。
劉青雲
去年2月《蘋果》就影到廿四孝老公劉青雲，獨自一人去九龍城街市買雞，為屋企準備團年飯，當時仲吸引咗好多師奶fans爭相同佢合照㖭。
鄭中基
已為人父嘅鄭中基，唔使開工嘅時候，都好住家男人㗎，好似去年大年初四俾《蘋果》影到佢坐住保母車去跑馬地街市買餸，話準備同屋企人打邊爐喎！
張栢芝
Lucas(謝振軒)同Quintus(謝振南)除咗有個煮嘢食好叻嘅爸爸謝霆鋒外，佢阿媽張栢芝都好叻㗎，栢芝仲會經常自己去街市買餸煮飯俾囝囝食，之前栢芝就先後兩次被影到去沙田嘅街市買餸，真係一個廿四孝媽媽。