落選港姐Mandy晒母女照網民驚訝：似兩姊妹喎

【蘋果日報】今屆港姐選舉，最終喺一片爭議聲中落幕，冠軍雷莊兒得獎輸民心，更慘成網民箭靶，相反伍樂兒同只得17歲嘅邱晴(Mandy)，大熱倒灶，網民都戥佢哋唔抵。
原來上個禮拜四(14日)，Mandy終於攞咗成人身份證。昨日佢喺IG貼咗兩張同媽咪嘅合照，留言多謝媽咪18年前帶佢嚟到呢個世界，Mandy話：「18年前的這段時間，辛苦你了，媽咪我愛你，1999.09.14」
嗱嗱嗱，雖則張相得Mandy同另一個長髮索女，估計相中着住橙紅色露膊裝嘅靚女，就係Mandy所講嘅媽咪，之但係，橫睇豎睇，外觀嚟講，頂盡都只係似Mandy個家姐，而網民亦都驚訝Mandy媽咪後生到得人驚，不過亦有網民話o依家P圖咁發達，真係要睇過真人先敢下判斷。