中環在線：鄧聲興與太太和好　唔離婚喇！

【蘋果日報】今年6月，金魚缸爆出花生事，指49歲仍然青靚白淨嘅股評人鄧聲興（Kenny），疑似戀上空姐，因而第二度鬧離婚，當事人一直避談此事。事隔三月，鄧聲興與太太Maggie噚日齊齊去遊船河，聽聞兩人已經和好如初，唔離婚嘞。
講到Kenny嘅兩段婚姻，魚缸中人都好熟識㗎喇，佢1995年同首任太太結婚，2008年中被周刊踢爆同當時係財經公關嘅Maggie有婚外情，Kenny自爆已離婚，2011年同Maggie拉埋天窗，2015年11月Maggie誕下龍鳳胎。
一對龍鳳胎就快兩歲，鄧生鄧太都係時候，多啲坐埋傾下報邊間幼稚園，Kenny專心返工搵錢罷喇。聽講，Maggie亦積極建議Kenny搵人操肌健身做運動，消耗多餘精力吖嘛。
李華華br /> LiWaWa@AppleDaily.com