媽呀好亂呀！祖兒阿Sa去「迪拜」定「杜拜」？

【蘋果日報】「當我一個夜遊杜拜如何過風沙中想起你……」
杜拜就是杜拜，歌都有得唱。而阿Sa蔡卓妍同Joey容祖兒早前呢pair「阿傻與煮鵝」亦在機場打卡，背景大大隻字目的地就是杜拜，航班CX731。兩人此行勁多靚人靚景分享，仲好有追看性。
兩人此行當然唔係旅行咁簡單，而係拍旅遊節目，鏡頭前得兩個人，鏡頭背後有成棚人。所以，唔好FF諗同行有邊位神秘男子幫阿傻與煮鵝嘅sweet sweet相揸機，係成村人！
節目都未知幾時播同邊度播，但Joey到昨日仍然好懷念佢喺杜拜同阿Sa嘅美麗時光，昨晚喺ig post兩人喺杜拜嘅片，寫道：「好掛住迪拜，好掛住阿傻。其實八個鐘飛機就到。真係好方便。期待下一次旅行」
咦……點解會係「迪拜」，唔係「杜拜」？係咪打錯字？又唔係喎，Joey同阿Sa嘅ig，落tag都係「迪拜」唔係「杜拜」，唔通佢哋係去另一個叫「迪拜」嘅地方？
但又唔係喎，上月25號，Joey出席公開活動時，已事先張揚話：「嚟緊會同阿Sa一齊去杜拜拍一啲旅遊嘅嘢，去五六日左右啦。」明明係話去「杜拜」喎…
再睇番阿Sa早前一條ig片，內容係謂兩人整奶昔。一開波Joey話：「Hello！我哋喺不丹呀！」阿Sa即糾正佢：「咩呀？杜拜呀！」然後阿Sa斜眼望望一點鐘方向，唔夠一秒即「更正」：「呀，迪拜，係迪拜。」
求解答。
或者，其實答案已好清楚。