【馮仁昭四圍超】阿澤搞網媒收背心見習生

【蘋果日報】杜汶澤識飲識食就係人都知，估唔到佢請人都好有眼光。佢日前喺facebook登招聘，前日就貼出一名索女倒瀉奶相後公告：「啱啱請咗人，嚟我公司做見習生，返12點收12點，你哋覺得佢個款，似唔似做得嘢呢？」阿澤新請的索女見習生立即被起底，名叫楊浩兒，鍾意曼聯連英文名都叫Manchester，身材弗爆嘅楊浩兒當然唔會吝嗇喺Instagram晒水着相。
講明睇心胸
阿澤原來同幾個友人集資搞網媒，所以招兵買馬，阿澤噚日話：「見習生要抹地、執枱、斟茶遞水一腳踢。」又話楊浩兒自我介紹叫「狗妹」。阿澤否認面試以貌取人：「出嚟社會做嘢，心胸必要廣闊。佢嚟見工着吊帶背心，佢話返工都係咁着。」狗妹未返工即熱爆網絡，阿澤會唔會開戲畀佢？佢話：「佢真係請返嚟抹地，冇講呢啲，一切由抹地做起。佢一夜成名，分分鐘紅過Celine（譚芷昀）。」阿澤預告佢個網會晚晚搞live show，仲會同「腦細」林日曦crossover。
撰文：馮仁昭