中環在線：萬達出po粉碎傳言

【蘋果日報】萬達集團近年頻頻到海外掃貨，搞到被中國政府高度關注，負面消息不斷。早排仲有媒體報道，話董事長王健林被禁止出境，搞到萬達急急撲出來澄清絕無此事。噚日萬達就喺集團嘅網頁，post咗一張王健林同前特首、現任政協副主席董建華嘅合照，提到係上星期五（8日）王親自嚟香港影嘅，曲線粉碎了王健林被限制出境的傳言。不過萬達就冇提到王健林同董伯伯傾咗啲乜喇。
早前《博聞社》曾報道，話王健林全家喺天津搭飛機欲出國時，遭內地當局扣留，重話搞咗幾個鐘先放返，雖然萬達之後澄清話係謠言，又話王健林早排先去完甘肅蘭州考察，但都仲算喺中國境內。唔知今次嚟香港同董伯伯影相，可唔可以全面平息流言蜚語呢？
李華華
LiWaWa@AppleDaily.com