四字頭使乜驚吳婉芳同阿女企埋似姊妹

【蘋果日報】現代科技越嚟越發達，有唔少仲應用咗喺日常生活上，而其中化妝品同保養產品就係一種，造就咗唔少「美魔女」嘅出現，眼見佢哋竟然可以對抗歲月呢個對女人嚟講嘅「死敵」，真係令唔少人嘖嘖稱奇，不過保養品用得再多，都要天生麗質先得，而圈中有唔少藝人年過四十都仲好似雙十年華一樣，而天生嘅仙氣隨住人生經歷就更有韻味。
李若彤
被喻為「最美小龍女」嘅李若彤當年出道真係驚為天人，陣陣仙氣散出嚟，咁多年過後佢喺2014年大台嘅《女人俱樂部》再次出現喺電視螢幕上，今次飾演師奶嘅佢美貌不減，仙氣配師奶令個氣質更加獨到。
朱茵
今年45歲嘅朱茵早年喺周星馳嘅電影上已經大放異彩，特別係喺《西遊記之仙履奇緣》中嘅紫霞仙子，清新脫俗，真係靚到「哇嘩聲」，近年少咗拍電影嘅佢今年接咗部大陸電影。
吳婉芳
1986年參加港姐大熱倒灶只得亞軍嘅吳婉芳今年原來已經48歲，但係佢完美表達咗咩叫做「歲月不留痕」嘅最高景界，已經生咗兩子一女嘅佢同阿女企埋一齊好似兩姊妹一樣。
舒淇
剛剛同馮德倫新婚嘅舒淇，唔經唔覺已經出道超過廿年，今年41歲嘅佢氣質出眾，咁多年都係各大化妝品牌嘅愛將，由台灣過到香港展開電影生涯嘅佢，咁多年嚟嘅作品多不勝數，更加多次獲獎。