【細路High翻天】 兩米瀡滑梯狂放電逾萬呎童樂區任玩唔使錢

【蘋果日報】公眾遊樂場拆攀爬架、瀡滑梯由斜變平，連小朋友都覺得唔刺激，寧願滑手機都好過落公園扮蝸牛滑坡，私人屋苑會所驚現1.7萬方呎孩童遊樂區！住客使用設施通通免費任玩。


新世界（017）西貢清水灣傲瀧項目會所面積約6.76萬方呎，外連約27.71萬方呎園林，住戶共享的休憩空間，屬今明兩年新入伙盤的三甲之列。


會所由韓籍建築師曹敏碩設計，而戶外區域由荷蘭作室Carve專門設計。Carve於1997年成立，專攻兒童遊樂場建築，作品散佈荷蘭、新加坡、土耳其等國家。


室內遊樂區亮點在於一條2米高的瀡滑梯，一班小朋友拍攝當日淨喺玩佢半個鐘都唔覺悶。家長可以埋一邊，望穿玻璃睇住囝囡上落，瀡滑梯底部亦有軟墊保護細路Patpat。


靜態的話，室內遊樂區有地方佈置到好似餐廳咁，畀小朋友齊齊玩「煮飯仔」，亦有兒童閱讀室可以睇書或者玩積木。


戶外的兒童玩樂設施有迷你沙池，小朋友唔洗去沙灘都可以堆城堡，玩到污糟邋遢之後，隔離仲有手搖水泵可以沖晒手手腳腳啲沙先返屋企。另外仲有個中央樂園，有3米高的瀡滑梯、大型攀爬架等，不過暫時未開放。


新世界第三代掌舵人鄭志剛近年主打藝術賣樓，傲瀧自然無例外要添啲藝術元素，例如話有雕塑公園，其中一組是由中國藝術家設計的巨型雲石積木，象徵無國界的快樂。


另外，屋苑管理費每方呎約4.9元，以單位實用面積介乎409方呎到3,372方呎計，每月管理費介乎2,004元到1.65萬元。