新聞類別
娛樂
詳情#
【蘋果日報】
賴慰玲同「邦民女」陳嘉寶（Anjaylia）兩個好姊妹今年先後出嫁，佢哋仲係上個月28日同一日入紙登記註冊結婚，兩姊妹真係心有靈犀！
31歲賴慰玲今年7月生日宣布有咗5個月，BB爸爸係拍拖5年嘅舞台劇演員梁子峰，賴慰玲接受傳媒訪問，話本來都係打算今年結婚，點知雙喜臨門，依家有咗7個月，佢話：「依家都唔會大搞，都係屋企人食吓飯，之後再睇吓湊B忙唔忙，如果輕鬆嘅，或者再搞。」
賴慰玲預產期係12月，佢係決定咗順產，之後會主力湊B，如果有工作，佢都會做，絕對唔會息影：「一直以來，由細到大都好想生，再唔生我會好唔開心，呢個年代演員生咗都可以繼續做嘢，一定要好實在咁做，我覺得咁樣係好有動力。」
Anjay嫁半億男友
27歲「邦民女」陳嘉寶（Anjaylia）11月25日嫁半億初戀男友黃頌祈，Anjaylia話大約兩個星期前入紙，問到婚禮籌備成點？「OK呀，一切交晒畀wedding planner，我哋又冇特別好奄尖，婚禮有主題，但依家唔講住，諗住畀驚喜大家。」好姐妹賴慰玲都入咗紙，Anjay好驚訝咁話：「我唔知喎，都係聽你講。」問到係咪唔怕紅事相沖，請埋賴慰玲嚟飲？Anjay話：「我係基督徒，完全冇呢啲諗法，我都會去幾個唔同婚禮，冇乜介意呢啲嘢。」
撰文：馮仁昭
回應 (0)
