新聞類別
娛樂
詳情#
【蘋果日報】李克勤為慶祝入行30年假紅館舉行9場騷，前晚頭場請到鄭秀文（Sammi）做嘉賓，一身灰藍look登場的Sammi笑說：「開頭我諗住着黃色，成條蕉咁樣升上嚟㗎嘛，今晚搞到成支波子汽水就出嚟。」
26年前兩人拍無綫劇《浪族闊少爺》，台上播出當年咀嘴劇照，Sammi問克勤入行30年，劇集是多久前拍攝？克勤說：「應該都差唔多。」Sammi大叫：「同得你做friend嘅，好易出賣年齡。」Sammi問克勤幾多歲？他說：「五張仲爭少少，男人到五張嘢先有啲男人味。」
無悔向後退
現年49歲的克勤更笑說：「之前你開騷，每次太太都嚟唔到，因為佢都大緊肚，所以嚟緊下次你開演唱會同我講聲。」Sammi笑說：「嘩！你五張嘢喇喎，仲可以咁厲害咩？」克勤得戚答：「你畀啲時間我準備。」
當唱完《紅日》、《深深深》等medley後，克勤有感而發說：「由2011年起，為咗家人慢慢向後踏後一步，一踏再踏，到依家都冇後悔，因為享受到好多家庭樂。」唱《護花使者》時以踢足球動作載歌載舞，坦言：「30年足球代表咗我好多嘢，仲有一個花名，其實我都唔知點解，但冇所謂，娛樂觀眾啦。」
此外，大會在間場時播出好友的短片，包括譚詠麟、劉德華、郭富城等，謝霆鋒叫他做「克勤叔叔」，黃偉文就拿着寫了「溫戚勤」的紙說：「當年揀天王冇揀中克勤，係啲人run chicken（走雞）。」
緊張到失眠
完騷後克勤在後台受訪說：「鬆一口氣，大步檻過，未曾試過冇full dress綵排就上台，擔心到唔係好瞓到覺。」克勤並多謝Sammi做嘉賓，對於台上播出兩人咀嘴劇照，他說：「我真係唔知，不過頭先佢（太太）喺後台攬一攬我，同我講good show，即係冇事啦。」
採訪：馬建華
攝影：沈健
回應 (0)
