智取大市：博工業復蘇概念

【蘋果日報】

雖然上周五恒指偏弱，但連續兩日升股多過跌股，唔少股份圖表靚仔，似要醞釀新一輪升浪，引用前輩黃國英近期金句：「無謂先天下之憂而憂。」


近兩期講到投資者炒作工業復蘇概念，中國燃氣（384）業務遍及中下游，城市燃氣項目之中，截至2017年3月底止全年，有43.4%天然氣總銷量來自工業用戶。


目前內地天然氣佔能源比重約6%，計劃2020年增加到10%，國家鼓勵之下，工業由傳統能源轉用燃氣嘅趨勢少有停止，加上民用需求同樣穩定，只要經濟非衰退，燃氣股業績普遍能穩步上揚。投資者憧憬工業復蘇，中燃氣自然重拾增長股估值。


油價大跌之下，中央為保持天然氣成本競爭力，發改委上月底公佈將非居民天然氣基準門站價格每立方米下調0.1元人民幣，下調門站價格同銷售價，相信利好下游企業，因為降低用氣成本，鼓勵市民用多啲燃氣。中燃氣股價因此破頂合理不過。


6月下旬開始，中燃氣股價一個月內由13蚊樓下爆升到接近20蚊，但之後個半月股價回到18蚊就撐得住，走勢比同業股份強。而家升到20蚊邊，預測今年度PE得18.8倍，以目前炒工業復蘇個Trend去計，絕對有水位。


晉佳

http://www.fb.com/advanceguy1

本欄逢周一、三、五刊出

晉佳