新聞類別
港聞
詳情#
【蘋果日報】【聲援良心犯】抗爭路上，總有些人是主角，有些人則選擇在鎂光燈後，以平視的目光，與有需要的人在一起。因東北案入獄13個月的周豁然，大抵是後者。為支持東北村民反逼遷，3年前默默住進村莊，與村民一同生活耕作，成為一分子。「佢叫周豁然，一定可以豁然面對。」退休大學講師郭永昌，是豁然的丈夫，因年輕妻子來到古洞，也因她選擇留下來。「我希望照顧呢度嘅一切，等佢返嚟。」
記者：呂麗嬋
「郭，我最大的心願，是在你離開我，或者我離開你之前，跟你好好地在一起。」豁然入獄兩周後，郭收到她的第一封家書，密密麻麻的字，記錄獄中所見所聞。受訪時表現冷靜的郭永昌，看着妻子的筆迹，感觸下淚。
「心情一直好反覆，呢兩星期都係咁，一直冇瞓好，不是忘了關燈，就是睡睡醒醒。」百呎鐵皮屋，一張雙人床和大蚊帳，一角放了煮食爐，未摺好的衫褲堆成小山丘。這裏是新界東北發展計劃關注組的辦公室，也是郭永昌夫婦的家。
盼照顧好家中農田貓狗
「未入屋，已有豁然嘅回憶，出面係佢種嘅田，仲有佢啲貓貓狗狗，有朋友叫我不如搬走，心情會好啲，但我同自己承諾，希望照顧好呢度嘅一切。」郭已3次探望妻子，「第一次同啲街坊一齊去探，仲有啲情緒，會眼濕濕，幾日後再去，佢已返緊工，被分派廚房工作，叫做比較接近佢熟悉嘅農務，福利官話佢好乖好快適應。」同案判囚的何潔泓和嚴敏華也在同一懲教所，郭計劃相約其家人探望，讓妻子藉此見戰友。「佢哋被囚喺同一個懲教所，但關喺不同倉，冇機會見到，喺入面，排隊唔可以周圍望，惟有探監嗰半個鐘，有家人喺度，可能寬鬆少少。」
妻子因非法集結入獄13個月，郭接受不了。「唔係因為要分開咁耐，而係法官話係暴力，豁然當日只係想為村民發聲，不見得經過深思熟慮。」郭謂那天若不是病了，可能一同被捕。「豁然行去邊我就去邊，因為咁被拉埋有乜出奇？」他承認社會上對抗爭有不同意見，有些村民也不同意衝。作為豁然的丈夫，會站在她的角度考慮：「點解要咁做？」為甚麼門常開變了門常關？為甚麼議會暴力不是暴力，竹枝就是暴力？也許沒有既定答案，但他想了解。
未搬到古洞前，郭居於馬鞍山屋苑，三房無敵靚景。「去鄉村，對於我嚟講係郊遊，其實到依家都好唔習慣，除咗蛇蟲鼠蟻，之前兩個風球，破壞力好大，真係會擔心飛走屋頂。」郭指：「以前我哋住喺翠擁華庭，但佢寧願坐小巴同踩單車嚟古洞工作，亦不要我揸車管接管送。」婚後一年，她乾脆搬進古洞鐵皮屋。「佢要嚟，我就跟住嚟，嚟咗半年不走，惟有賣樓。」事到如今，郭直言後無退路，繼續等待。「嚟緊星期四會再去探佢，中間隔咗一個星期，收到封家書，感覺冇咁漫長，人不在，感覺在。」
回應 (0)
