中環在線：杜如風唔帶阿媽去旅行

【蘋果日報】

縱橫遊（8069）打算明年農曆新年搞日本豪華團，再由旅遊達人杜如風帶隊。縱橫遊行政總裁袁振寧爆料話，今年第一次搞，原本以為會有杜如風嘅「瘋狂粉絲」，好彩完全冇，團友大部份都係4字出頭嘅中年人，仲有杜如風媽媽。


不過杜如風話，明年唔諗住帶埋媽媽一齊去，因為上次佢乜都唔畀買，完全買唔夠喉。好似佢本身睇中咗隻手鐲，諗計仔想引開媽媽注意力去畀錢，點知杜媽媽非常醒目：「你唔好諗，我企喺你隔籬。」


為咗可以買嘢，明年就唔會叫媽媽同行嘞。之不過，作為女兒，都係要賣下乖：「最多買多啲嘢送畀佢！」不過如意算盤點止咁樣，「佢唔啱，我借嚟着都得嘅！」認真多鬼主意。


李華華

LiWaWa@AppleDaily.com