縱橫遊包機　重啟熊本直航

【蘋果日報】繼今年初開價88,888元、找來旅遊達人杜如風帶豪華團豪遊日本本州，縱橫遊（8069）行政總裁袁振寧指該團反應不錯，明年農曆新年會續推，更擬加價至10萬元以上！

杜如風帶隊　團費10萬

袁振寧笑指，「上次唔夠時間買嘢」，故今次計劃延長一日至6日5夜，同樣由杜如風帶團遊日，擬加價至10萬元以上，但未透露具體目的地。不過名額將由20名減至16名，先到先得，「因為好多再好啲嘅餐廳、再靚啲嘅巴士坐唔到咁多人」。


另一方面，縱橫遊擬聯同香港快運以加班機形式，未來一年重開熊本直航及旅行團。11月16日首飛，每周來回兩班，惟票價尚未公佈。


袁振寧指，地震後3個月，在日本政府補助之下，九州已逐步復蘇，「其實（旅行團）停咗成年，熊本縣政府4月份開始就想將條直航線復原番，佢哋覺得旅遊設施都有九成復修到」。


袁指熊本縣政府認為當地已適合旅遊，故縱橫遊決定開團，並與香港快運合作重啟熊本直航，合約暫為一年。加班機較定期航班較快獲民航處批准，不過他指「風險大少少，要我地畀晒所有機位錢先」。


11月後起計半年，縱橫遊已承包該航線所有機位，確保旅行團有優先訂位權，同時亦會開放一定比例予公眾訂購，其後視乎反應決定是否續包機位。至於熊本直航一年後會否繼續，他稱取決於航空公司。