中環在線：雲遊搵阿里舊部做COO進軍Fintech

【蘋果日報專訊】一直經營遊戲業務嘅雲遊（484）有意發展金融科技（Fintech）咁喎！公司噚日於北京宣佈，收購Fintech平台簡理財，簡理財CEO張陽出任雲遊COO，即日生效。雲遊主席汪東風指，簡理財係雲遊進軍Fintech嘅一張門票，未來要做「普惠金融領域的AlphaGo」。汪東風介紹，收購簡理財只係雲遊Fintech戰略嘅第一步，未來將結合簡理財已積累嘅業務優勢、技術優勢同雲遊嘅互聯網入口、流量，進行「圍繞打造更強核心能力，在金融鏈條各個環節佈局」戰略升級，通過雲遊自身大數據處理能力、機器學習基礎上嘅風控技術模型，配合應用場景進行商業決策。新上任嘅COO張陽現年36歲，喺阿里巴巴工作超過十年，又喺雅虎中國、淘寶網、口碑網、支付寶、阿里雲等擔任過高級管理職位。佢前年創辦簡理財，主要通過簡理財品牌經營網站同手機APP，於內地從事互聯網金融。雲遊噚日股價冇乜點郁，可能大家對張陽都係抱觀望態度。李華華
李華華
LiWaWa@AppleDaily.com