執番條命 詹培忠4次手術花400萬

【明報專訊】立法會前議員詹培忠（圖）上年6月宣布參選港島區立法會選舉，之後就未見佢出現，當時有指佢心臟有事，但外間都唔知詳情。詹培忠噚日同記者聚會時就透露，原來佢宣布參選後翌日出現「心臟撕裂」，先後做過4次手術，可以話係執番條命。


求觀音庇佑 大步檻過戒酒戒牛

詹培忠話，佢宣布參選後第二日，凌晨3點幾時心口突然好痛，但當時為咗唔想叫救護車搞到左鄰右里都知道，於是忍到天光，咁辛苦之際求庇佑，向家中嘅觀音講如果跨過呢關，佢就會戒酒同戒牛肉。結果第二朝食完早餐後就去港安醫院，主診醫生隨即叫佢入深切治療部，佢先後做過4次手術，包括修補番心臟撕裂嘅血管、「通波仔」同喺心臟內放起搏器等。


詹培忠話，出事前幾日佢喺澳門賭場贏咗977萬元，而呢幾次手術埋單大約要400萬，連同分畀老婆、選舉用咗200萬等，當時贏嘅錢已經使晒。


佢話現時身體康復得幾好，只係行動仍有啲不便，家都心癢癢想去賭場玩幾手，但未敢行開住，期望下年同太太慶祝結婚50周年之餘，可以順便去澳門玩番幾手啦。