股壇大隻佬郭sir開台 吸睛度更勝4女主播

【明報專訊】有「股壇大隻佬」之稱嘅郭思治過咗去民眾金融（0279）旗下民眾證券之後，已經講明會集中火力搞網上財經台，籌備咗幾個月，郭Sir透露一切已經準備就緒，下個月就會開台，噚日仲放咗段預告短片上網畀大家欣賞(口添)。
郭Sir話，開台之後每日都會邀請唔同嘅分析師講解大市形勢，仲好神秘咁話請到超重量級名人拍攝王牌節目，講到明會保證出乎大家意料之外。嗱！個王牌節目有幾出乎意料之外，(口依)家就未知，不過噚日睇完段預告片，小琴就有小小失望。
點解咁講？事關小琴好記得之前郭Sir話過會響節目度講吓健身、點樣減肥、點樣Keep Fit，仲話會親自響鏡頭前示範，所以噚日同班女同事圍埋睇片，雖然郭Sir帶埋4名女主播亮相，但原來大家更期待係佢會唔會show下馬甲線同老鼠仔囉！點知成條片郭Sir都西裝骨骨，包得鬼咁密實，露肉度太低搞到女同事好唔開心！
email: piano@mingpao.com
[小琴密語]