DSE放榜 楊偉雄去「外父中學」打氣

【明報專訊】中學文憑試（DSE）今日放榜，相信唔少考生都緊張，特首林鄭月娥一聲令下，呢兩日多名司局長都去到自己母校，同一班師弟妹打氣。本身唔喺香港讀書嘅創新及科技局長楊偉雄，就去咗同佢外父翁祐有淵源嘅順德聯誼總會翁祐中學為學生打氣，勉勵應屆考生樂觀面對，仲負責頒獎(口添)。
林鄭月娥話，希望學生唔好因為一次成績而氣餒，要對自己有信心。林太就返咗母校嘉諾撒聖方濟各書院，打氣之餘仲同師妹合照，噚晚仲喺facebook上載司局長探訪母校片段，教育局長楊潤雄、保安局長李家超去九龍華仁書院，同學生一齊「放飛機」，祝大家放榜順利。運房局長陳帆去喇沙書院；環境局長黃錦星就去齊兩間讀過嘅中學，包括保良局第一張永慶中學及聖文德書院；民政事務局長劉江華就去聖保羅書院等。
本身就讀天主教培聖中學嘅財政司長陳茂波，返母校時仲高舉右手、手握拳頭，高呼﹕「前途在我手，永不放棄，努力、加油！Yeah！」
劉怡翔勉勵師弟兼BBQ
全港咁多間中學，今屆唯一女局長、曾就讀跑馬地聖保祿中學嘅食物及衛生局長陳肇始去咗兩間中學打氣，又同一班學生自拍，其中一間係同為「Paulinians」嘅聖保祿學校，一班女學生高呼「2017一定得」，佢仲去埋何東女子中學(口添)。
可能就咁打氣太單調，財經事務及庫務局長劉怡翔返去母校聖芳濟書院，同一班學生燒烤，勉勵同學無論拎到咩成績，都唔好忘記興趣同志向，裝備自己，發揮校訓剛毅精神。