毛孟靜：倘人社合併會加入

【明報專訊】人民力量上周六晚喺旺角一間酒樓舉行周年晚宴，筵開30幾席，同支持者玩番一晚，唔少泛民中人同議員都有出席，好似社民連梁國雄（長毛）、香港本土毛孟靜、朱凱廸、香港眾志羅冠聰同黃之鋒等。立法會內嘅激進力量較分散，唔少都係「1人黨」議員，一直傳聞佢哋有意組成聯盟壯大聲勢、加強合作，前晚毛孟靜就喺台上突然話，如果人民力量同社民連合併，佢就會加入！唔知大家之後有無機會見到呢一幕呢？


長毛稱拒邀請做美容代言人

活動比較搞笑一幕係抽獎環節，長毛抽到由人力前主席袁彌明送出嘅排毒薄荷面膜，大家就要佢即場試用睇吓效果。長毛又自爆網上傳媒「謎米香港」創辦人之一蕭若元曾出7位數字酬勞邀請佢擔任美容代言人，但長毛就拒絕咗。


人民力量議員陳志全（慢必）作為晚宴「主人家」，喺活動上當然要貢獻一下，先後唱咗兩首歌娛賓，抽獎環節佢更加「好運」地將頭獎抽咗畀自己，慢必當然捐番出嚟再抽畀支持者啦。