民主黨議員挑戰「回歸神曲」

【明報專訊】為慶祝香港回歸20周年，新華社官方fb日前有唔少搞作都令人印象深刻，其中由香港老牌歌手張明敏個仔張頌華主唱嘅《我的Hong Kong》，因為啲歌詞「完全唔啱音」而成為熱話。民主黨fb噚日上載咗一條短片，要一班民主黨立法會議員嚟個「回歸神曲大挑戰」（圖），搞到佢哋投晒降。


民主黨fb小編搵嚟鄺俊宇、胡志偉、黃碧雲、林卓廷、尹兆堅同許智峯參加呢個大挑戰，要佢哋跟住新華社個MV一齊唱。唔少人一聽首歌就不約而同笑咗出嚟，黃碧雲好愕然咁話﹕「啲音都唔啱嘅？」林卓廷直情話﹕「再睇都頂佢唔順、咁樣填得詞就唔使有填詞人啦。」其中鄺俊宇同胡志偉就聽到呆咗，民主黨fb小編問佢哋：「聽唔聽得明？」佢哋都無反應、若有所思咁，鄺神最後皺晒眉反問：「係咪咁樣啊？」


最後幾個都一人一句唱副歌，但鄺神依然好唔忿氣咁話：「走樣變形啊簡直係！」許智峯唱完「專閹副強的你相（尊嚴富強的理想）」就忍唔住問套MV係咪官方版本，仲唔多信係真。