書展專題展 記者借出中東服飾

【明報專訊】香港書展將於今個月19日至25日舉行，今年以「旅遊」做主題，特設專題展覽，展出唔同旅遊作家、探險家嘅收藏品，其中包括戰地記者喺以巴地區著嘅服飾、極地探險家李樂詩喺北極採集嘅北極棉。
新華社前駐以巴地區記者、現任端傳媒國際新聞總監周軼君就拎出佢喺以巴採訪時著嘅長袍同頭巾，仲有佢喺當地拍攝嘅「哈馬斯小戰士」相片。周軼君話，當地宗教認為頭髮係邪惡嘅，所以婦女外出基本上都要著長袍同頭巾，佢試過唔記得戴頭巾出街，被小孩掟石頭。
周軼君又話，當年採訪武裝組織哈馬斯活動時，見過一個五六歲嘅女仔著晒戰士服飾、手執玩具槍，被推上台歡迎當地領袖，佢見到小朋友天真無邪嘅眼神同當下嘅氣氛形成強烈對比，所以即刻影咗張相，「哈馬斯小戰士」呢張相其後被多個外國通訊社採用。
專題展覽設喺書展3樓展覽廳外，同場仲有相展，相片由《國家地理雜誌》提供，展出40幾幅捕捉到香港唔同地方、人文風景嘅相，其中包括之前贏過2015年國家地理攝影大賽青年組冠軍、Kelvin Yuen嘅作品。