添馬慶回歸 陳玉娥做音樂會MC

【明報專訊】人稱「娥姐」嘅網絡紅人陳玉娥又有新搞作，佢星期日會喺添馬露天劇場參加「好歌慶回歸20周年中環音樂會」，屆時有超過30個歌手出席，不過娥姐今次唔會上台唱歌，而係做司儀，Emily聽到都覺得好新鮮。今次係娥姐第一次做音樂會MC，佢話係「處女下海，BB仔學吓嘢」，仲好謙虛咁話自己只係襯托嘉賓嘅「花瓶」喎。


「十萬個歡迎」楊岳橋嚟

相信大家同Emily一樣都好關心娥姐嘅「緋聞男友」、公民黨黨魁楊岳橋會唔會現身支持呢？舊年9月立法會選舉公布結果當日，兩人喺點票中心一張「額頭貼額頭」相喺網絡爆紅，娥姐就請Emily幫手穿針引線，話如果楊生肯嚟，佢一定十萬個歡迎，仲話要畀佢做主禮嘉賓。好多人都想聽娥姐即場高歌一曲，但娥姐就話要賣個關子，畀啲神秘感各位。大會仲安排咗網台DJ何鳳仙同娥姐一齊拍住做MC。