譴責周浩鼎委員會 7人報名建制佔5

【明報專訊】立法會早前通過成立譴責民建聯周浩鼎嘅調查委員會，處理前特首梁振英透過佢提交調查UGL事宜委員會文件一事，截至噚日，一共有7名獲提名加入呢個委員會嘅議員，而7個人之中，建制佔咗5席。Emily之前了解過，建制派曾考慮全取7席，家可以話已經「放生」咗兩席畀民主派。


立法會內務委員會上月底根據《議事規則》，通過就譴責周浩鼎而成立調查委員會，7名已報名加入呢個調查委員會嘅議員中，5人係建制派，分別為「建制班長」商界議員廖長江、民建聯進出口界黃定光、工聯會勞工界陸頌雄、經民聯地產及建造界石禮謙，同埋工業界吳永嘉；兩名民主派分別係民主黨涂謹申及公民黨法律界郭榮鏗。


調查委員會將有7人，有主席及副主席，據Emily了解，建制派有人曾提出要全取7席，後來決定「放生」兩席畀民主派，即使咁，佢哋喺委員會依然有絕對優勢。另外，建制派擬推薦石禮謙做主席。調查委員會嘅委員將於7月7日嘅內務委員會會議中選出。