「自信好要緊 應該放開胸襟」 習引譚詠麟《創造命運》勉港人

【明報專訊】國家主席習近平來港3日，除咗警察忙住部署，佢嘅行程亦非常忙碌。主席噚晚喺灣仔君悅酒店出席特區政府晚宴，致辭嗰陣提到港人要有「三個相信」，包括相信自己、香港同埋國家，最估唔到嘅係，佢特登咁引述老牌歌手譚詠麟主唱嘅廣東歌《創造命運》其中一句歌詞「自信好要緊應該放開胸襟願望定會一切都變真」，勉勵香港人。


《創造命運》係譚詠麟1984年出版嘅大碟《霧之戀》其中一首作品，而80年代正值香港前途談判關鍵時期，唔知習主席體唔體會到香港人當時面對嘅處境同感受呢？Emily搵到首歌嘅作詞人黃百鳴，佢知道咗習近平引用歌詞之後，不停話「好驚訝，好驚訝」，又話首歌喺80年代寫畀譚詠麟，用嚟勉勵香港人，認為就算過咗30幾年，首歌仍然啱香港人用，笑言「幾時做人都要係咁」。