彭麗媛訪幼園 李梓敬等獻花未如願

【明報專訊】國家主席習近平夫人彭麗媛噚日下午到訪九龍塘又一村幼稚園，當區區議員、自由黨李梓敬就好興奮，其間喺facebook做直播，喺外圍「直擊」主席夫人到達同埋離開幼稚園一幕，仲買埋花同帶埋佢個仔去，諗住會唔會有機會獻花畀主席夫人。


李梓敬話，自己都係提前一日獲知主席夫人大駕光臨，本身以為噚日有機會近距離接觸，話唔定仲有機會可以握手。因此佢噚日做足準備，帶住一家人，仲買咗一紮紅色嘅花預備迎接彭麗媛。不過彭麗媛歷史性到訪，保安森嚴，除咗封路，居民都唔可以路過。但當區區議員就佔咗地利優勢，佢噚日從旁邊私人屋苑鐵欄望出去，直接距離仲近過一眾記者。李梓敬又趁彭麗媛進出學校時，大呼「主席夫人，我們香港歡迎你！」，唔知彭麗媛有無聽到呢。


至於點解又一村學校獲選中，佢就相信因為門口落車位夠大，周圍矮樓較多，因此安全系數好高。