曾為林鄭助選 港大女生與習握手

【明報專訊】國家主席習近平噚日抵港，Emily喺機場停機坪採訪期間，見到曾經幫候任特首林鄭月娥助選、近日現身內地官方央視新聞微博嘅港大女學生章詠欣，佢原來「更上一層樓」，身處歡迎習近平嘅人群中揮動國旗區旗；習近平落機後沿紅地氈步行，仲同章同學握手，章同學笑容滿面回應。


章詠欣現時讀緊港大文學院四年級，曾經擔任港大國事學會幹事會主席，林鄭月娥喺2月為特首選舉舉行競選分享大會時，就由包括章詠欣等一班年輕人陪同進場。幾個月後，央視新聞微博日前上載短片，章同學喺片中分享以往籌辦絲綢之路交流團嘅經歷。


另外，習近平專機噚日抵埗後，特首梁振英同夫人梁唐青儀率先走入機艙，未夠40秒就自己行番出嚟，習近平其後先與太太彭麗媛步出機艙。Emily睇番5年前時任國家主席胡錦濤訪港片段，發現當時時任特首曾蔭權，係先待胡錦濤落機後，再隨其他隨行人員步出，同今次情况有所不同。


Emily唔知梁特首伉儷短暫停留機艙原因為何，本身係飛機師嘅公民黨譚文豪噚日喺facebook就打趣話，有時候航班太密，有啲心急嘅清潔姐姐喺飛機落晒客之前就會上機，空中服務員喺呢個時候，就會好有禮貌咁講：「未落晒客，請你出番去先。」