七一遊行訴求動議 張華峰修正案通過

【明報專訊】立法會大會噚日辯論由民主黨尹兆堅提出嘅「正視七一遊行市民的訴求」議員動議，不過臨到投票一刻，民主派議員全體離場，欲製造流會，但幾分鐘後又集體返回議事廳，究竟泛民搞邊科呢？

泛民想搞流會不果

原來噚日開會時，非建制派唔係好夠人，社民連梁國雄、香港眾志羅冠聰就因前日衝擊金紫荊廣場被捕，警方一直未放人，自決派劉小麗發言時兩次以「厚顏無恥」鬧建制派議員何君堯，被代主席李慧琼指含侮辱性而將佢逐離會議廳，結果議案分組點票時，地區直選方面以一票之差，令經民聯張華峰修正案通過咗。佢嘅修正案中要求刪除「一國兩制動搖、走樣」字眼，又增加「積極配合國家經濟發展，促進大灣區發展」等。


對此感到憤怒嘅民主派，就一度諗過玩流會，令經修訂嘅議案拖到下個星期再處理。不過最後就計算錯誤，因建制派有足夠人數維持會議而失敗告終。對於民主派想搞流會拖延，尹兆堅就解釋，作為民主派議員有責任盡最大努力阻止違反民意嘅議案通過。