與300人對話 太空星星「不眨眼」 楊利偉答學生﹕無見過外星人

【明報專訊】慶回歸20周年節目陸續有，中國「神舟五號」太空人楊利偉、「神舟十一號」太空人景海鵬同陳冬，噚日去到香港各界慶典委員會舉辦嘅「創科驅動 成就夢想」創新科技展覽，同300名小學生對話，大談太空飛行趣事。唔知點解，啲小朋友對外星人特別好奇，唔止一個學生問太空人有無見過外星人。楊利偉就話畀佢哋知，真係無見過，但係希望香港學生將來有機會建立自己嘅航天事業，見到外星人時就同佢分享，得一眾學生好開心。
楊利偉仲同學生分享，喺太空見到嘅星星，同喺地球見到嘅唔一樣。佢話喺太空見到嘅星星會更亮，但因無大氣層嘅關係，唔似喺地球上見到嘅星星咁「一閃一閃」，形容為「不會眨的眼睛」。
陳冬﹕太空「失重」 著褲方便
曾喺太空飛行33日嘅陳冬就分享太空生活趣事，佢話，由於「失重」嘅原故，喺太空著褲時好方便，隨手將褲拋出去，就輕易將兩腿「塞進去」；平日又可以同拍檔景海鵬互拋花生畀對方食，「把花生丟到空中就輕易進到對方的口中，吃得特別香」。
小學四年級生戴同學話，細細個就對探索太空好有興趣，知道中國太空人會嚟香港就立即報名參加，估唔到噚日可以被抽中第一個發問，會後又攞到太空人簽名，所以好開心。