「炸掉西九站」論 梁愛詩話係講笑

【明報專訊】西九高鐵站邊檢安排至今未有定案，基本法委員會副主任梁愛詩（詩姐）曾經形容，如果西九站無一地兩檢，「即係要炸咗佢」重新規劃。詩姐噚日出席民主黨主席劉慧卿嘅網台嘅節目時，澄清自己當時只係講吓笑，語氣並非「兇神惡煞」，當時係想表達一地兩檢嘅重要，話外國不時用炸藥清拆樓宇，而西九站嘅架構做唔到商場，所以如果做唔到高鐵站，唯一方法就係拆咗佢。


對於近年有人針對外籍法官嘅言論，曾任律政司長嘅詩姐形容呢啲批評係「唔啱」，強調法官係咩國籍並唔緊要，又質疑批評者無睇清楚，現時有89%法官都能操雙語。


另外，基本法委員會主任李飛早前透露，西九站邊檢會依照西部通道做法，律政司長袁國強噚日出席活動後話，現階段仍未適合公布詳情，唔方便就個別人士言論發表意見，但重申目標係喺高鐵明年第三季通車時落實一地兩檢。