九巴研辦假日寵物巴士路線

【明報專訊】養貓、養狗、養白兔等嘅市民爭取多年嘅寵物巴士路線終於露出曙光！九巴噚日書面回覆立法會議員劉國勳查詢時「開綠燈」，話對於喺假日開設寵物巴士路線持開放態度，願意探討畀乘客帶同指定類別同大小嘅動物，例如狗，喺乘客合理地看管下一齊上車嘅可行性，較以往取態積極好多。


不過，根據《公共巴士服務規例》第10(2)(C)條規定，除咗陪同失明人士坐車嘅導盲犬外，乘客唔可以攜帶雀鳥、寵物或其他動物上車。九巴話基於法例限制，要開辦寵物巴士路線必須克服一啲限制，包括法例能否放寬攜帶寵物上車、對何謂寵物作清晰界定，以及唔會對其他乘客帶來不便或影響車務運作。九巴話會就開辦寵物巴士路線嘅構思，同運輸署保持緊密溝通及做可行性研究。


劉國勳話歡迎九巴就開辦寵物巴士路線「開綠燈」，之後會喺立法會繼續跟進，包括要求運輸署修例，放寬乘客攜帶寵物坐專營巴士及港鐵嘅限制。