全球最大吊掛花燈慶回歸

【明報專訊】慶祝回歸20周年同紮花燈都有關係？道教非牟利慈善團體「通善壇」喺中環舉行「華燈閃爍耀香江」大型傳統紮作花燈展覽，搵咗在囚青年同醫院嘅小朋友，分別製作花燈唔同部件，再合併成一個大型吊掛花燈。政務司長張建宗噚日出席花燈展開幕禮致辭時，話呢個傳統紮作嘅花燈係全世界最大型嘅吊掛花燈，稍後會申請健力士證書，「相信可讓更多市民大眾感受同分享到特區成立20周年嘅喜悅」。