3校贏競委會宣傳賽 下月獅城交流

【明報專訊】競爭事務委員會成立一年半以嚟，除咗做研究報告、調查涉嫌違反競爭法嘅公司，仲有做唔同方面嘅宣傳教育。競委會噚日就公布「競爭有道」全港中學生宣傳創作比賽結果，顯理中學、聖傑靈女子中學同埋順德聯誼總會李兆基中學3支隊伍贏得大獎，可以代表香港下月去新加坡交流。
小食部作題材 拍片講合謀定價
顯理中學嘅同學就喺片中扮鬼扮馬，扮演兩個小食部嘅老闆，夾埋推高小食部零食價錢，點知被學生發現佢哋合謀定價，違反競爭法。順德聯誼總會李兆基中學嘅同學，就用港人熟悉嘅機票優惠做題目，同學仔扮演兩間航空公司負責人，合謀加行李價格。
至於聖傑靈女子中學嘅同學，就藉虛構人物「黃老伯」比武招親嘅故事，去講有參加者阻止其他人贏比賽，做出反競爭行為。競委會主席兼比賽首席評判胡紅玉就讚勝出嘅作品好有創意，亦顯示出同學對條例有清晰理解。
候任特首林鄭月娥日前公布新任行會人選，胡紅玉將離任，Emily噚日想八卦吓佢嘅未來去向，不過胡紅玉一完咗頒獎禮就急急腳走咗，Emily想問都無機會。