青民換屆 兩小花吸睛

【明報專訊】青年民建聯早前換屆，換咗唔少新面孔上場，Emily噚日發現，其中有兩個副秘書長特別吸睛，包括29歲嘅植潔鈴（Elaine）同埋25歲嘅賴嘉汶（Apple）。早前青民facebook都有不斷出post介紹成員，有民記「毛毛」透露，原來Apple同Elaine嘅瀏覽量多達4000人次，大幅拋離主席顏汶羽約900人次，睇嚟靚女嘅人氣真係無法擋。現時青民有超過1700名會員，唔知兩「小花」強勢加入，係咪都可以催谷下會員人數？
顏汶羽喺傳媒茶敘透露，新一屆青民有三大目標，包括發展會員、培養青年政治人才，以及最快年底前制訂好「青年政策建議書」。佢透露，報告希望從住屋、參政等四大範疇做研究，其中會拜訪專家學者、到18區聽不同意見等，佢話認真程度媲美政府諮詢報告。
主席：正制訂青年政策建議書
不過，候任特首林鄭月娥早排話希望中央政策組吸收多啲年輕新血，顏汶羽就話，若果用合約公務員形式聘請，服務地區嘅年輕人要辭去區議員或者現職，令唔少人卻步，最後或只能吸納剛畢業無耐、對政策有興趣嘅後生仔。