280品牌提供2800項優惠 7．1購物節 $7.1歎奶茶羊腩煲

【明報專訊】嚟緊七一係香港回歸廿周年，仲要係紅假，放假最好就係去行街買嘢，香港O2O電子商務總會今年搞咗個「7．1 O2O香港購物節」，有成280個品牌提供大約2800項優惠，仲要好應節咁賣7.1元，或者有七一折。Emily已經記低咗啲好正嘅優惠，諗住一放假就出動。購物節除咗有多項折扣優惠，仲有名人聯乘嘅獨家產品。
包括餐飲家品服裝美容
購物節有唔少7.1元或七一折嘅優惠產品，太興、銀龍同羅麥記都會推出7.1元奶茶，潮家海鮮酒家仲有賣7.1元嘅炸雲吞同羊腩煲。計Emily話，梗係食完早餐，行街行到攰，之後再醫肚。
如果七一唔得閒都唔使怕，部分優惠會推出1星期至1個月不等，或者可以去Yahoo網上精選商店，有機會用1元就買到德國寶高速電蒸鍋。演員袁詠儀、任達華、孫耀威等名人同其他品牌仲專登為今次購物節聯手創作服飾產品，都可以喺Yahoo買到。香港O2O電子商務總會創會會長陳嘉賢話畀Emily知，今次有三分之一優惠都係由餐飲業提供，家品、服裝、美容都應有盡有，仲可以線上線下並駕齊驅，想點買都得。
如果想知多啲優惠詳情，可以上香港O2O電子商務總會嘅網站，或者下載「HKOEF」手機應用程式，咁就隨時隨地都睇到喇。